如果你是一位歌手,你最想得到的會是什麼?出街時別人會認得你?會有膾炙人口的代表作?在K房大熱的歌曲?唱片銷量會有白金數字?去紅館開演唱會?
相信以上種種都是歌手的目標。但有時,你得到越多,成績越好,其實未必一定開心。起碼側田不會,坦白說側田2005年推出首張專輯《Justin》,首日銷量已高達15,000張,至2006年2月為止,已賣超過35,000張,至同年3月底銷量高達白金唱片數字,更於同年3開個人首個紅館演唱會。當時他有「一碟上紅館」的美譽。不過當大家認為這一切是夢寐以求的際遇時,側田卻不認同:「當時係好唔開心,透唔到氣。」
側田是一位實力歌手相信無人質疑。他當年憑著第一張專輯《Justin》踏上紅館舞臺已經打破多位歌手紀錄,不過他除了音樂得到大家認同及關注外,私生活也成為關注的地方。在他出走到北京發展前,也因為種種新聞令他形象受損。最後他有感不適應香港娛樂圈,所以決定到北京發展。雖說側田短暫離開香港,但他的音樂沒有離開,側田式的情歌依然是K房必唱歌,更是陪了很多人渡過不少傷心的晚上。
側田坦言入行嘅時候很順利,不過當時他過得並不開心。
歌手側田,剛出道時已得到大家的注目。他向來都是以實力為賣點,而且出道不久就得到了可遇不可求的紅館檔期,在其他人眼中本應是當年最為風光,最為開心的日子,但對側田來說反而是最不快的時光:「我承認入行嘅時候好順,但我當時係好唔開心,因為太透唔到氣。我當時唔係好慣做呢行。初入行已經有太多傳媒attention。我覺得有時好多social media嘅報導都係唔可信,嗰年出咗一個報導話我賺好多錢,列哂我做咗咩job幾多個騷。但我睇睇戶口,其實真係無咁多錢。直到幾年前又有一份報導話我好窮,其實當時我銀行係最多錢嘅時候。所以我以前會覺得咁多新聞無一個係中立。」
歌手側田出道不久便憑著《Justin》踏上紅館舞臺。
提到側田去北京發展前,爆出的新聞令他形象受損,側田沒有避而不談:「以前細個受嘅挫折其實係好事,後生時乜都會推卸責任,唔會覺得自己有問題。而家我會明白好多嘢都係因自己而起。其實有咩唔好嘅事發生喺自己身上,首先係要識得反省自己。每一件事都有一個原因。以前我會覺得一定係人哋問題,人哋黑心,其實有時可能真係自己問題。以前發生嘅事我當係交學費。」
側田自言40歲的自己終於在社會大學畢業。
側田今次受訪,不論心態與談吐都比從前樂天不少,而且他亦坦承以前的他成就了今天的自己:「我去北京之前係好唔開心,我覺得喺香港做呢行,個遊戲規則唔係好適合我。因為當你under contract(簽了合約)就有一個責任,要做好多你未必想做嘅嘢,我明白呢個係必經階段。我會諗點解我要做咁多我唔想做嘅嘢呢?當時我真係頂唔順,我當時好唔開心,身邊嘅人都唔開心,所以我咪決定走囉(去北京)。一段時間後我心態改變,變得成熟。所以由北京返香港,依家自己做音樂都幾enjoy。不過我好感激當時嘅同事,佢哋係有幫過我。如果無以前嘅唔開心,就無而家嘅我。」側田續說:「喺呢一行,通常大約30歲左右就會知道條路點行,但我30歲先入行,用咗10年時間交學費。我依家40歲終於喺社會大學畢業。」
曾受負面新聞影響的側田:「以前發生嘅事我當係交學費。」
雖說側田曾離開香港一段時間,但開騷依然叫座。今年12月舉行的兩場紅館演唱會,門票今日公開發售,但短短時間已火速爆滿,實力仍在。